నేరాల నియంత్రణే ధ్యేయంగా పల్నాడు జిల్లాలో కార్డెన్ & సెర్చ్ ఆపరేషన్లు: ఎస్పీ శ్రీనివాసరావు
పల్నాడు జిల్లా, జూలై 30, 2025: పల్నాడు జిల్లాలో శాంతిభద్రతల పరిరక్షణ, నేరాల నియంత్రణే లక్ష్యంగా కార్డెన్ & సెర్చ్ ఆపరేషన్లు విస్తృతంగా నిర్వహిస్తున్నట్లు పల్నాడు జిల్లా ఎస్పీ శ్రీ కంచి శ్రీనివాసరావు ఐపీఎస్ గారు తెలిపారు. సంఘ వ్యతిరేక శక్తులు, అసాంఘిక కార్యకలాపాలకు పాల్పడే వారిని, సామాన్య ప్రజలను ఇబ్బందులకు గురిచేసే వారిని గుర్తించి, ప్రజలకు “మేమున్నాము” అనే భరోసా కల్పిస్తున్నట్లు ఆయన పేర్కొన్నారు.
నరసరావుపేట రూరల్ పోలీస్ స్టేషన్ పరిధిలోని చీకటి కాలనీలో మరియు నకరికల్లు పోలీస్ స్టేషన్ పరిధిలోని కుంకలగుంట గ్రామాలలో ఎస్పీ గారి ఆదేశాల మేరకు ప్రత్యేక కార్డెన్ & సెర్చ్ కార్యక్రమాలు చేపట్టారు. ఈ ఆపరేషన్లలో రౌడీషీటర్లు, ట్రబుల్ మాంగర్స్, పాత కేసుల్లోని నిందితులపై ప్రత్యేక నిఘా ఉంచి, వారి ఇళ్లు మరియు పరిసర ప్రాంతాలలో విస్తృత తనిఖీలు నిర్వహించారు.
ఈ తనిఖీలలో చీకటి కాలనీలో సరైన పత్రాలు లేని 25 ద్విచక్ర వాహనాలు, 2 కత్తులు స్వాధీనం చేసుకున్నారు. అదేవిధంగా, కుంకలగుంటలో సరైన పత్రాలు లేని 36 ద్విచక్ర వాహనాలు, 10 కత్తులు, 2 గొడ్డళ్లు, మరియు 1 గడ్డపార స్వాధీనం చేసుకున్నారు.
కార్డెన్ & సెర్చ్ ఆపరేషన్లలో భాగంగా పోలీసులు ఫుట్ పెట్రోలింగ్ నిర్వహించి, గ్రామస్తులతో సమావేశాలు ఏర్పాటు చేసి వివిధ అంశాలపై అవగాహన కల్పించారు. నాటుసారా, గుట్కా నియంత్రణ కోసం అనుమానితులు, పాత కేసుల్లోని నిందితుల ఇళ్లల్లో, పశువుల పాకలు, గడ్డివాములు, దుకాణాలు, బడ్డీ కొట్లలో క్షుణ్ణంగా తనిఖీలు చేశారు. అక్రమ మద్యం జోలికి వెళితే కఠిన చర్యలు తప్పవని హెచ్చరికలు జారీ చేశారు. పాత కేసుల్లోని నిందితులతో సమావేశమై, పాత పంథా మానుకుని సత్ప్రవర్తనతో మెలగాలని సూచించారు.
చీకటి కాలనీలో జరిగిన ఈ కార్యక్రమంలో నరసరావుపేట రూరల్ పోలీస్ స్టేషన్ సీఐ పసుపులేటి రామకృష్ణ గారు, రూరల్ పోలీస్ స్టేషన్ ఎస్సై కిషోర్ గారు, చిలకలూరిపేట టౌన్ పోలీస్ స్టేషన్ ఎస్సై రహమతుల్లా గారు, ట్రాఫిక్ ఎస్సై వేణు గారు, నాదెండ్ల ఎస్సై గారు, యడ్లపాడు ఎస్సై గారు మరియు పోలీసు సిబ్బంది పాల్గొన్నారు.
కుంకలగుంటలో జరిగిన కార్యక్రమంలో సత్తెనపల్లి డీఎస్పీ ఎం. హనుమంతరావు గారు, సత్తెనపల్లి రూరల్ సీఐ కిరణ్ గారు, సత్తెనపల్లి టౌన్ సీఐ నాగమల్లేశ్వర రావు గారు, అమరావతి సీఐ అచ్చయ్య గారు, పెదకూరపాడు సీఐ సురేష్ గారు, నకరికల్లు ఎస్సై సిహెచ్. సురేష్ గారు, సత్తెనపల్లి రూరల్ ఎస్సై గారు, రాజుపాలెం ఎస్సై గారు మరియు సిబ్బంది పాల్గొన్నారు.
